LG V10芒上芒　走马灯显示资讯

2020-06-07

曲屏做到滥晒，双镜头、4k畀人抢先一步，为咗出奇制胜，手机厂商可以去到几尽？LG V10一于玩奇特，嚟个双屏幕配置，喺主屏上方整第二个屏幕，仲要係走马灯式。虽然概念近似2010年Samsung Continuum，不过市场上冇咩同类竞争对手，怀旧当新货都勉强过到骨。

当年Samsung Continuum个1.8吋副屏幕喺主屏下边，可以显示时间、天气、快捷操控播放器等。今次LG V10就放上顶，个高度仲窄咗唔少，得返一行仔，同前置镜并排。爆料嘅Evan Blass话，LG V10将配置5.7吋屏幕（2,560 x 1,440）、Snapdragon 808、3GB RAM，以及1,600万像后置镜、500万像前置镜。塑胶製机背会附有指纹扫瞄器，支援双卡双待。其实副屏幕细成咁，笔者真係睇唔透有咩用喇，係咪睇即时股票行情？可能勉强放到几个程式捷径嘅。